CAA Singers at Folkloric Dance Company, wagi sa Pasikatan sa Buwan ng Wika

Pinatunayan ng Colegio ng Lungsod ng Batangas (CLB) ang buhay na kulturang Pilipino nang mag-uwi ng kampeonato sina Janno M. Macalintal at Trexie Noriel G. Cueto at ikalawang pwesto ang CLB Folkloric Dance Company sa ginanap na Patimpalak sa Katutubong Sayaw at Kantahan bilang bahagi ng pagdiriwang ng Pasikatan sa Buwan ng Wika, Agosto 30.

Ipinamalas nina Macalintal at Cueto ang makahulugan at masiglang pag-awit na nagbigay-buhay sa bawat liriko ng kanilang kanta, dahilan ng kanilang pagkakapanalo laban sa iba’t ibang paaralang kalahok.

Hindi rin nagpahuli ang CLB Faculty at Folkloric Dance Company sa kanilang masiglang pag-indak ng Komintang, isang sayaw na ipinagmamalaki ng kulturang Batangueño.

Ang marikit na kumpas ng kanilang mga kamay at paa ay naghatid ng malakas na palakpakan mula sa mga manonood.

Binalot naman ng buong suporta ng mga estudyante ng CLB, sa pangunguna nina G. Lorenz Aaron M. Isla at G. Jeffson Acorda, ang mga kalahok na naging malaking bahagi ng kanilang pagkapanalo.

Ayon sa Cultural Office ng Lungsod, layunin ng patimpalak na ipagmalaki at ipamalas ang husay at puso sa kulturang Pilipino.