SANTELMO, JMA, nanguna sa Buwan ng Wika; CLB, nagpugay sa Kulturang Asyano

Itinanghal na kampeon ang SANTELMO sa paggawa ng booth tampok ang bansang Indonesia, habang nakamit naman ng JMA ang kampeonato sa parehong kategorya sa patimpalak sa kasuotan na dala ang bandila ng bansang Malaysia, sa selebrasyon ng Buwan ng Wika ng Colegio ng Lungsod ng Batangas (CLB) na may temang “Ugnayang Wika at Kultura: Pilipinas at Timog-Silangang Asya” noong Agosto 26–29.

Kasunod ng SANTELMO sa booth-making competition ang Culture and Arts Association (CAA) na ikalawang pwesto at ang JMA sa ikatlong pwesto.

Sa patimpalak sa kasuotan, pumangalawa ang ATLES at pumangatlo ang ARTISANS GUILD—na nagpalitan ng pwesto sa pambabae at panlalaking kategorya.

Bilang bahagi ng programa, ang iba't ibang organisasyon gaya ng YACAP-U, CLIMB, JPIA, JMA, JFINIX, JPMAP, SANTELMO, ARTISANS GUILD, ATLES, CAA, at FES ay nagpamalas rin sa paggawa ng kani-kanilang booth kung saan ipinakita ang kultura, pagkain, magagandang destinasyon, at mga yaman ng iba’t ibang bansa sa Timog-Silangang Asya.

Nagkaroon din ng patimpalak sa kasuotan na inirampa ng mga estudyanteng kumakatawan sa mga bansang napili.

Ang nasabing pagdiriwang ngayong taon ay muling pinangunahan ng Culture and Arts Association (CAA) sa pamumuno ni Ginoong Jeffson Acorda, Tagapayo ng CAA.

Nagtapos ang programa sa pagbibigay ng plake ng pagkilala sa mga organisasyong nakilahok.

Ayon kay Dr. Dolores Borras, VPAA, ang aktibidad ay hindi lamang naging pagdiriwang ng pagkakakilanlang wika, kundi selebrasyon din ng pagkakaisa at pakikisama.